Eskob
Labour zo d'ober c'hoazh a-raok peurechuiñ ar pennad-mañ. Ma fell deoc'h reiñ un tamm skoazell, krogit e-barzh. Mar karfec'h reiñ hoc'h ali ha netra ken, grit 'ta e pajenn ar gaozeadenn.
Un eskob (liester : eskibien) a zo un c'hloareg (pe den a iliz) en ilizoù kristen zo, an aotrouniezh bras gantañ. Ul lid a vez aozet gant un eskob (pe meur a eskob) all evit reiñ dezhañ ar garg. Lavarout a reer eo bet eskobet.
[kemmañ] Gerdarzh
Eus ar gresianeg kozh e teu ar ger eskob = episkopos (επισκοπος) a c'hell bezañ troet gant evezhier. Eus ar ger eskob e teu "eskobel" "eskobiezh" "eskopti" ha kement zo.
[kemmañ] Eskibien er Testamant nevez
Pemp gwech e vez kavet ar ger eskob en Testamant Nevez:
- Oberoù an Ebestel 20:28
- Lizher d'ar Filipianed 1:1
- Lizher kentañ da Dimoteos 3:2
- Lizher da Ditus 1:7
- Lizher kentañ da Bêr 2:25
Daoust ha n'eo ket bet krouet ar garg-se gant Jezuz-Krist, e seblant bezañ ur stad reizh e penn kentañ diorroadur ar relijion gristen. Diaes eo ober un diforc'h gant hini ar presbyter (πρεσβυτερος), met an diagon a weler e Lizher da Dimoteos a seblant dindan beli an eskob.
E Oberoù an Ebestel e reer eus an eskob ur mesaer evit e dropell, ur skeudenn voutin implijet en amzer hiziv c'hoazh. El Lizher da Dimoteos e reer "pried ur wreg nemetken" eus outañ, met n'eo ket sklaer ma 'z eus kaoz eus nac'hañ dezho an eildimeziñ pe eus al liespriedelezh. Met, n'eus roud ebet eus eskibien a vije difennet outo dimeziñ ha genel krouadurioù d'ar c'houlz-se.
[kemmañ] An Eskibien diwar skridoù an Ebestel
Diwar obererezh an Tadoù abostol e voe aozet an Iliz kristen nevez en un doare efedusoc'h ken ma yelo roll an eskibien da vezañ pouezusoc'h en IIvet kantved.
Gwelet eo e skridoù Ignatius Antioch. En e Lizher d'ar Magnesianed e tispleg :
"Lakait an holl da zoujañ ouzh an diagoned koulz hag e tleont doujañ ouzh an eskob hag eñ skeudenn an Tad ha doujañ ouzh ar veleged ivez, ken e toujer ouzh ar re-se evel kuzul Doue ha Strollad an Ebestel".